February 13, 2017
ING MISA PARA KING KAPATAD TAMUNG MEANGUBIE
​
DING LITURGIA PARA KARING
MEANGUBIE CRISTIANO
​
Arapan na ning kamatayan, papasiag ning Banal a Kapulungan ing katutuan na lelangan ne ning Dios ing tau para king bie alang angga at i Jesus, ing Anak ning Dios, kapamilatan ning keang kamatayan at pamanyubling mebie, piklud na ing tanikalang mitatali king tau king kasalanan at kamatayan. I Cristo migtagumpe ya king pamagligtas na king meto ketauan ibat king kasalanan at ya ing miyayampang ganap a sakripisyu ban munie kapurian king Dios kapamilatan ning Misterio Paskual: ing keang kamatayan, pamanyubling mebie at pamaitas na king ligaya banua.
King kamatayan ning metung a Cristiano, a nung nukarin ing bie na anting talasalpantaya megmula king Sacramento ning Binyag at mipasiknangan kapamilatan ning Eucharistia, ing Banal a Kapulungan mamilatan ya para king meangubie uli ning keang kapaniualang ing kamatayan aliua ya ing kapupusan ning bie. Ing Banal a Kapulungan makirame ya karing kematen kapamilatan ning Liturgia para karing Meangubie Cristiano, kapamilatan da ring Amanu ning malam a Dios, at king Sacramento ning Eucharistia.
Ding Cristiano pagmasusian de ing ritu ban munie kapurian at kapasalamatan king Dios king bie a pigkalub na a ngeni mibalik na kaya, ing panibatan ning bie at kapanayan ding makatuliran. Ing Misa, a pamigaganaka king kamatayan at pamanyubli nang mie Cristo, iya pin ing taluktuk ning kapagmasusian ning Ritu ning Pamangutkut.
Ing Banal a Kapulungan, kapamilatan na ning Liturgia para karing Meangubie Cristiano daraun ne ing meangubie king Dios a mapamakalulu at panyauad na lang kapatauaran ding karelang kasalanan. King Liturgia para karing Meangubie Cristiano, lalu na king kapagmasusian king sakripisyu ning Eucharistia, ding talasalpantaya patutuan da at papasiag da ing pamisanmetung ning Banal a Kapulungan keti labuad at karin banua, kambe da ring pamisamak ding banal. Bista man makakauani na la karing mabie, ding meangubie kasanmetung da la pa mu rin ding talasalpantaya keti labuad at makinabang la pa mu rin karing karelang panalangin at pamamilatan. King Ritu ning Tauling Pamidaun at Pamamun, ding talasalpantaya tatanggapan da ing pamikauani at panabilin de ing meangubie king Dios. King makaniting paralan abibitasa ra ing espiritual a pamisanmetung a mamilatan karing mabie at meangubie, at papasiag da ing kapaniualan na ring sablang meangubie subli lang mie at makisanmetung lang pasibayu king bayung yatu at bayung banua, a nung nu ing bie e matatampus.
